Matthew 13

1Dna n nyipyei hi mi, nʼsa do yi Yesu wa fa ʼpi wa lo ʼdnagbe. 2– 3Aza yezhi ɓo nmwa begye. Wa lodna nʼya wa wu aza dna ko, aza kukpe nuwan gbe ɓai kna tnubua. Waku anyi ɓesisi mwa dna n wo wazi. Wa ku do ho si lai “Fwaiza ho ɓo lo nyabye nwo fwa 4Wa she nyabye ya fi nfwa, adoho ɓa kaya kpe n zokwo, a lu ɓa ɓe ɓa ɓa zotnu. 5Adoho ɓa kaya kpe napma n kni pele-peleyi. Ɓa ku pa wolo-wolo kpe ʼkni pele-peleyi konu. 6Ama nyipyei wowo a ku ɓa wu, n tu ge oɓa gbegye to lokni lo mwa m. 7– 8Adoho ɓa kaya fi na knawuyi, aknawuyi a ɓa yekma. Ama adoho ɓa kaya fi nʼkni manayi, ɓa ga gyi-gyi ndu do na ɓo she. Doha bwa shita, doho shitnanyi, doho tagyi. 9Ngye fye na tnubua yi lo, fye wo!”

10Owa bara ɓe ɓa nya wo ge kni zhin hoi ɓe naɓe-sisi yi n ɓa dnaɓo a?

11Wa gna ɓa ge alaye fye fya kpe Eshe Ebemi ɓeye, ama toge azaje m.

12– 13“Ntu ge eza nwo nyai, aɓa ɓewo wa bwa mwa,” ama eza n wo to ceyi m, “Ko odo n wo ncei fyewyi, a ɓeyi la gwo wo. Ce nu zhin mi yi da ɓo naɓe-sisi yi ntu ge ɓa wo, ɓai gye, to ɓa bwa aweygan.”

14“Deye kwa nu enya anabi Ishaya ɓoda, ‘Ɓa wo, ama awyega to lon, ɓai shawye, to ɓai gyen!

15“ ‘Ntu ge oɓa bugba woshan lo, oɓa tnubua yi gugui lo, ɓai ku ɓa wye kpe ɓai wan gye.’ 16Ntu ce nu ɓa ta gye, ɓai wo ɓa bwa awyega, ɓa jeze ɓe Shekwoyi aba njesun ma ka ɓa gnan. Amma efya wye zhin anabarka nya nu, ntu ge ɓa gyelo, nfya tnubua yi, ntu ge ɓa wo lo. 17Gaiciya, n mwa begye nu anabi n na ɓefyecei yi ɓo ye ɓa gyaɓo fye ku gye, ɓai wo aɓo nfye ku wo, to ɓa min.

18“To fye wo besisi awyega fwaiza nya nwo nyabye yi. 19Zokwo nʼnyabye ɓo kaya kpe nyi, kwo wu gye ʼza bugba, n wo wo nabari manayi Shekwoyi Ebemi nya, to wa bwa awyegam, Shetanwa ɓe wa ɓeda yi gwo wo ya n wo bugba. 20Apma ʼba, ekni pele-pelei ko wu gye ʼza bugba n wo wo nabari wa gwo kwo na gmada yi. 21Ama ntu ge wo to nabai lo wa so ko dna n wo wye-wyei n, esa wahala laka ntu wo gaiciya ga ɓo, sai wo fuse, wa fa viɓo. 22Ekni aknawuyi nya ko wu gye za n wo wo nabari, ama aɓopwawo anyi nya, nʼ nyabwa zanshinyi, ɓa ku Shekwoyi ɓeda gyisun, to wa mi nwo zhin nyaho ntu Shekwoyi ɓo m. 23Ekni manayi gbedo nʼza bugbai nwo wo nabari kwa lowo na wyegayi har wa gni gyiba ɓecei ndu nya bye kokoi, doho shita, shitnai, har ma tagyi.”

24Yesu wa je ɓesisi ye da: “Shekwoyi Ebe wulo ngye fwai za n wo bye nyabye manai n wo fwa, 25Ama n sukwoyi, woi la wangye, owo nuwunyi wa ɓe wa ku alogyi bye fyi na shewyi. 26Shi ashewyi ɓo ya mwa, alogya mwa ɓahin ce.

27“Fwaizahi akodogo da ɓe ɓa gna wo, ‘Zadnagmai, aba yi ɓo bye nyabye manayi nyi, gye alogyi pa fi lo ɓodo.’

28“Wa gna ɓa, ‘Nuwun-yi ho na lo woi bye ɓa fi.’ Ɓa nya wo ge, ‘Yi lo yi shi ɓa ya?’

29“Wa gna, ‘Awo, fye ɓa shi ashewyi ya ɓedo. 30Fa ɓa mwa dnado har esa naɓa gbe ɓa. Mʼ ɓei gna anyagbei ɓa tnu alogyi-ya kpa ɓa gyi ɓa ʼna, ama ɓaye ku ashewyi fi n dobui.’ ” 31– 32Ɓesisi do jesun, wa gna, “Shekwoyi Ebe mi wulo gye musta byegye (nya-bye-gye nu ciwyi ngye fulu) a bye kwo dna fwa. Ko gna nyabye doho-dohoi gba-gbayi, ama kwo zhin kwa ze shinwan dnagmai har alu a bwa abwi ba n kwa bwala.”

33Wa je ɓesisi ge, “Shekwoyi Ebe ɓa wu gye nyikoza n wo zhin bredi! She wo sin wyiluku, wa gmi kwaje n yisti yi, wa bu ko har kwa wyilukuyi gwo vinya.” 34– 35Yesu ɓo bwa ɓeda n dejiyi n naɓesisi yi nu. Anabi ɓo ku da ionu ge wo ɓei sanyi ɓesisi n mwa. Ntu cenu, wo to ɓo wu ɓa nyahon sai ri ɓesisi yi vi. Pmada anabi nyanyi, “Mʼɓeyi daɓo na ɓesisi yi; Mi-wu aɓo ɓodnai pei-pei n ɓa ɓo so zhi, tunyi shi anyi ɓei ya.” 36Wa fa ʼza zhi n bmi wa lo apyi mi, owa bara gna wo ge wo wu ɓa awyega ɓesisi ashewyi nya na logyi yi.

37Yesu wa ci ɓa ge, “Madela, Emi nu zhin fwai n wo bye nyabye manayi nyi. 38Ofa kwo nu zhin anyi, nyabye manayi kwo nu zhin aza Shekwoyi Ebe nya; alogyi kuwa ɓa nu zhin Shetan aza. 39Nuwunyi n wo ɓo bye alogyi fi na shewyi nyi, Shetan nu; ashewyi gbe sa ko zhin anyi zo sa, ashewyi gbe-yi a malaika nu.

40“Ngye shi atnu alogyi ya agyi ɓaʼna n nabari ye nyi, nlo nu kwo ɓei ze nanyi zo sa. 41Mi ɓei tnu n Ma malaika yi ɓo tnu jaraba ya n na ɓenukwoyi zhin-yi yi n She kwoyi ʼbe. 42Aɓo she ɓa ya fi nʼna ɓai gyi ʼna, Nbwayi aɓei cibwi ai gyi anyikna naje. 43Ama Shekwoyi aza ɓo fun ngye nyipyei dna ɓa Dada be mi. Aza nɓa na tnubua yi, ɓa wo.

44“Shekwoyi Ebe wulo ngye duciya nu n za ɓo gye n dna kni. Ntu dada ɓo, wa lo wa ku anya kun vinya n wo ɓo cei ntu ge wa bwa agyiwye kunce wa si ekni yi konu.

45“Shekwoyi Ebe wulo ngye duciya da nu n wo kun akuta anabmiya-yi ntu cenu wa laɓa woi zan amanayi shin. 46Wa pmi wa odo gye n wo ɓa bwa gyiba, wa lo wa ku anya kun vinya ntu ge wa si kwo.

47– 48“Aɓa mi a mwi Shekwoyi Ebe mi do n bmiya wan yi, n wo she esa fi n nuwan wa wan abmiya manayi na nukwoyi nyi. Shi ɓa la nu osa, wa ɓe cei n kma wa tnu amanayi wa ce anukwoyi wa ya. 49Nlo nu kwo ɓei ze nanyi zo sa-amalaika ɓo tnu aza nukwoi ya na ɓefyeceyi. 50Aɓo she aza nukwoyi ya fi nʼna, n bwayi aɓo cibwi ai gya nyikna naje.” 51Wa nya ɓa ge, “Fye ku awyega bwa?” Ɓa gna, “E, yi ku bwa.”

52Wa je ɓa gna ge, “Aza n ɓa kpe a Yahudawayi owa ye ɓai zhin ma bara nu, ɓa ku duciya bwa ngun aba wato alkawali ko-koyi n woi-woi yi.”

Kafinta Nugun Nu To Bwasun?

53– 54Shi Yesu ɓo ku a ɓesisi ye zo da, wa jeze lo wa ʼyi (Nazarat n Galili kni) wa wu aza dna na duwa nyakun, ceiwo ɓa vinya ntu wo yekpe ɓo naɓo wo-woyi n wo ɓo zhin nyi.

55Ɓa nya ge, “Wo mi n wuna woi zhin lanya? Kafinta nugun nu to bwa gnin? Owo ya ai yi ge Maryamu n? Owa zaje nu to n Yakub yi Yusufu yi, n Siman yi ɓedo n Yahuda yi n? 56Owa mapwi njesun n fyi n ʼya. Ko zhin wuna wo la ze za dnagmayi a?” 57Owo ɓo kwa san ɓa, Yesu wa gna ɓa ge, anabi to n mwa-mwa yi dna wayi n wa za ba yin, sai dna zhi do. 58Wa bwa aɓo wo-woi zhin fyewyi nu ɓo ntu ɓa tna gaiciya ga ɓo.